新居

 

January 23, 2012 （小公主32個月7日大）

http://blog.yahoo.com/miss-jubie

 

 

Miss Jubie 話咗今篇會開估就唔會賴貓，個主題已經好清楚開咗估，係！我哋搬咗屋，所以都係屬於一件喜事！你哋恭喜我都啱架喇～多謝大家嘅祝賀，我照單全收！哈哈哈～

其實搬屋真係唔係一件容易嘅事，由搵地方，到搬到新屋都要有好多野要安排，所以攪到我人都癲～ 又要Book電梯，又要搵搬運公司格價，又要Pack箱，真係搬親屋都會唔見一籮穀….. (其實係趁今次機會清走咗七年嚟儲落嘅垃圾^^)

我哋搬屋其係為咗小公主將來而搬，因為而家新屋嘅學校網比較好，所以決定要搬…… 其二係新屋比以前舊屋更近我同"打令"老公返工嘅路程，所以決定要搬…… 雖然喺舊屋度住咗七年幾喺有啲唔捨得，不過舊嘅唔去，新嘅又點會嚟呢？

而家新屋執得七七八八，終於可以見得吓人，就影幾張相同你哋分享吓啦～

至於生小皇子就一切順應天意，一切隨緣把啦～～ 哈哈哈～

.....

....

...

..

.

搬咗屋，當然要自我慶祝一番，自己去買咗兩打生蠔，一pack海膽，同兩隻日本扇貝帶子返屋企自己新鮮即開即食。

呢餐和味囉，價錢亦都好"甘"，不過間唔中一餐，氹吓自己都冇壞啫？(^_^)>

最後Miss Jubie祝大家新年快樂，龍年行好運，個個都心想事成，想嗰樣得嗰樣！！！！恭喜發財！！！

 

安格斯牛肉絲炒雜菜 (Stir Fried Angus Beef with Vegetables)

 (食譜來源: Miss Jubie自創食譜)

http://blog.yahoo.com/miss-jubie

 

呢個菜式係Miss Jubie突然創造出嚟，今日當然要同大家分享一吓，呢個菜式貌似韓國炒粉絲，但就冇果啲韓國玻璃粉絲同麻油架，而且仲味道甜甜哋，啱晒小朋友食～

呢個菜式可以伴飯食又得，伴麵食又得，再唔係夾麵包做餡食都得，真係唔錯嘅選擇，你哋有興趣都試吓煮，我冇介紹錯架！

 

安格斯牛肉絲炒雜菜 (Stir Fried Angus Beef with Vegetables)

(食譜來源: Miss Jubie自創食譜)

http://blog.yahoo.com/miss-jubie

材料: (4人份量)

洋蔥---半個 （洗淨，抹乾，切絲）

紅蘿蔔---1/3條 （洗淨，刨皮，抹乾，切絲）

青椒---1個（洗淨，抹乾，去囊，切絲）

白磨菇---8-10粒（略沖洗，抹乾，切片）

安格斯牛肉絲---1 Pack（約1磅多）

青蔥---2條 （洗淨，抹乾，切段）

 

牛肉絲醃料：

生抽---適量

老抽---少許

胡椒粉---適量

海鹽---適量

 

汁料調味：

李錦記甜豉油（煲仔飯專用）---4 Tablespoon

安格斯牛肉絲炒雜菜 (Stir Fried Angus Beef with Vegetables)

(食譜來源: Miss Jubie自創食譜)

http://blog.yahoo.com/miss-jubie

做法：

1. 雜菜：先將洋蔥，紅蘿蔔，青椒等，洗淨，抹乾，切絲； 白磨菇略為沖水去泥，然後抹乾，切片；青蔥洗淨，抹乾，切段；以上材料備用

2. 將安格斯牛肉絲加入適量生抽，胡椒粉，海鹽，及少量老抽，伴勻後醃15-20分鐘，備用

3. 燒紅個PAN，落油，轉中火，先爆香洋蔥絲，再加入磨菇片，青椒絲及紅蘿蔔絲，略兜，再加入安格斯牛肉絲，略兜，然後將李錦記甜豉油倒入，炒至牛肉絲差唔多九成熟，加入青蔥段略兜，最後為咗令汁料杰身，將生粉加水伴勻後倒入已抄好嘅雜菜炒牛肉絲再略兜，熄火，立即完成～

 

 

 

 

回到聖誕時

Dec 24, 2011 （小公主31個月8日大）

Miss Jubie 呢一個多月嚟，家事公事兩邊忙，所以都冇時間更新呢個BLOG..... 趁今日得閒，就立即講吓最近嘅近況～

公事忙係因為經理放咗大假，所以我要兼顧埋佢某啲部份嘅工作；而私事就，遲啲你哋都會發覺得到架喇.....

呢篇BLOG要追索返去聖誕節平安夜嗰日....

嗰日喺係媽咪屋企度慶祝聖誕節，開聖誕大食會PARTY！

我哋有好多好野食，有煙三文魚，

午餐肉雜果沙律，

 

 

吞拿魚釀青瓜片，

烤夫，

手絲雞，

燒春雞伴CRANBERRY醬，

日本雜錦刺身及壽司，

 

 

 

仲有炆牛尾添～

 

 

當然唔少得紅酒同啤酒坐陣啦！

 

你哋睇吓小公主食得幾滋味就知啦！

 

 

 

最後當然要分享吓啲聖誕禮物啦，不過大部份都係屬於小公主嘅！哈哈哈～

附上小公主 "騎爛隻鹿" 實錄 2011, 搞笑騎鹿片段，祝大家新年快樂！



下篇我會POST食譜，你哋有興趣就得閒嚟探我啦！～

唔識貨！

Nov 6, 2011 （小公主29個月22日大）

Miss Jubie 上一篇提及過，近日我都想心思思買部電動車俾小公主玩，等佢開心吓～ 點知竟然有人唔識貨，有正野唔要，係都要CHEAP野，仲要冇貨買唔成～ 抵死～～～ 唔駛買，慳番！哈哈哈～～～

件事係咁嘅，我啱啱物色到一部電動玩具車，就係呢部mini cooper，啱啱知道做緊on sale推廣，由於減緊價，所以驚多人買，怕買唔到，於是發晒癲叫'打令'老公即刻仆倒去買.....

'打令'老公話可能多數都會俾人買晒，所以叫我死心.....但我唔肯，終於扭到佢陪我去睇吓先，冇就認命！我仲捉埋公公同婆婆一齊去！

點知去到仲有貨，好野！！！其實我都好鬼低能，咁大個人仲扭計，但買唔到真嘅，就買架玩具俾個女玩，當完成我心願啦～ 點知個女唔吼架車～～～ 噓～～～～～

小公主見到架mini cooper竟然冇反應，抱佢去坐，唔夠兩分鐘就要走返出嚟，試咗幾次都係咁，我好失望呀.....

相反，見到呢架人力發動嘅警車（即係自己用腳行），隻蠢豬反而愛不釋手，死都唔肯落車！價錢相差好遠，但佢要平唔要貴。冇法喇，唯有問職員有冇貨，點知已經冇晒喇～ 所以我話，抵死～～～ 慳番唔駛買！哈哈哈～～～

公公想偷走架車，小公主即刻搶！真係俾佢笑死！



然後公公就去同佢玩腳踏PIANO......

不捨得放棄的回憶

Oct 29, 2011 （小公主29個月15日大）




Miss Jubie爭扎咗成個月，今日終於的起心肝，upgrade咗呢個Blog....

攪咗成日，終於都將舊有嘅網誌Transfer到呢個新Blog度.....

攪咗成日，唔係我唔識整，係Yahoo嗰邊唔知做乜鬼，慢到死， Transfer得好鬼慢，等咗成朝，下晝先成功搬晒所有網誌到呢度....

本來都想趁Yahoo Blog Upgrade做借口而諗過想接埋呢個Blog，但諗起自己放咗幾年青春去經營呢個Blog，記錄咗我，打令老公同小公主唔少回憶，所以都係好唔捨得同放唔低之下，決定都係Upgrade咗佢，繼續寫落去.....Upgrade咗之後，再set過啲野都唔係好難，只係upload啲相時就慢啲同upload有時會唔到囉！如果YAHOO改善咗upload相嗰度就唔成問題喇～

講返小公主，而家同佢去親街，一入到百貨公司，第一時間就摟要去玩具部玩車車.....

一係就去到Ikea，就要去玩具部玩啲玩具同啲枱凳，玩到唔捨得走.....

近日我都想心思思買部電動車俾佢玩，等佢開心吓～

而我啱啱物色到一部玩具車，不過未必買得到，如果買得成我先開估話俾大家知～

 

 

 

開心一日遊

Oct 10, 2011 （小公主28個月22日大）
http://hk.myblog.yahoo.com/miss-jubie/article?mid=41368


Miss Jubie同'打令'老公近排周末都較忙，所以冇咩時間帶小公主出去玩，趁啱啱有個長周末假期，就幫小公主出去影吓相，之後又同姨姨去公園玩....



小公主而家好鐘意跟住我哋做動作，我哋做咩，佢就跟住做乜，有樣學樣，所以近排我哋啲言行舉止都要好小心，因為怕佢學咗就大件事喇～


我哋影相前，當然要醫飽咗個肚先啦～


小公主對任何事都好好奇，尤其是啲小動物，一啲都唔怕，會用手去掂，所以我哋一見親狗都會拖實小公主，怕佢去追去摸～


小公主仍然好怕打韆鞦，一打就喊，真係冇鬼用....



但係sir滑梯又玩得好鬼癲，一啲都唔驚喎～






慢慢睇相啦，唔講咁多喇，我要唞唞喇～

鹹蝦醬炒爽辣豬頸肉

(食譜來源: Miss Jubie 自己食譜)
http://hk.myblog.yahoo.com/miss-jubie/article?mid=41316

Miss Jubie想煮呢個餸好耐，不過近排先至有機會一試！呢個餸喺無線電視一個節目中（好似係蘇玉華做主持），其中一集介紹長洲特色食品嘅時候，蘇玉華訪問一個長洲居民而得知呢個餸嘅煮法，所以我又試吓煮啦，因為貪佢夠簡單夠方便。

而我經今次一試，覺得好惹味！因為我自己再加啲辣椒醬落去炒，既有鹹蝦醬嘅風味，亦有少許辣味，所以真係好惹味！呢個餸得閒煮一煮，真係一個唔錯嘅選擇，因為呢個餸一定唔會失手！所以冇有怕！



材料: (2-3人份量)

鹹蝦醬炒爽辣豬頸肉
(食譜來源: Miss Jubie 自己食譜)
http://hk.myblog.yahoo.com/miss-jubie/article?mid=41316

豬頸肉---1 Pack（洗淨，抹乾，切絲，備用）

鹹蝦醬---1 1/2 Tablespoon （如豬頸肉份量夠炒一碟就用1 1/2 Tablespoon，少過就用1 Tablespoon， 多過就用2 Tablespoon）

素辣椒醬---1 Tablespoon（可增加少許辣味，怕辣可以唔加）



做法：

鹹蝦醬炒爽辣豬頸肉
(食譜來源: Miss Jubie 自己食譜)
http://hk.myblog.yahoo.com/miss-jubie/article?mid=41316

1. 豬頸肉洗淨，抹乾，切絲，備用

2. 用大火燒紅個Pan，加一匙油，爆香鹹蝦醬，然後放入豬頸肉絲，炒至八成熟

3. 及後再加入素辣椒醬，然後兜勻及炒至全熟，熄火，上碟，完成！

美顏排毒瘦身雜菜湯

(食譜來源: Miss Jubie 自己食譜)
http://hk.myblog.yahoo.com/miss-jubie/article?mid=41270

Miss Jubie上篇講過，記得早排有個Blog友 仔問過想要雜菜湯食譜，於是我就再煮咗呢個湯.... 點解呢個雜菜湯會叫做美顏排毒瘦身雜菜湯呢？其實係因為當時呢個雜菜湯係用嚟減肥時飲嘅，因為個湯冇落任何肉類，菜又有益，加上飲得多水份，皮膚就會好， 但椰菜又去水，其他蔬菜又夠纖維質，所以會排毒（即係"屙屎"，對唔住明明講緊食野，又講呢味真係唔係好啱，但係怕有啲人唔明會問咩叫"排毒"...所以 明嗰啲Blog友就將就吓啦。）我配合埋嗰個西柚減肥餐一齊食，所以食咗都減到好多磅數，各位Blog友，你有興趣可以試吓煲嚟飲.....




材料: (8-10碗份量)
美顏排毒瘦身雜菜湯
(食譜來源: Miss Jubie 自己食譜)
http://hk.myblog.yahoo.com/miss-jubie/article?mid=41270

清水---1大煲（約8-10碗水，視乎煲Size而定）

椰菜---半個（切小片後洗淨，備用）

洋蔥---半個（切絲，備用）

蕃茄---4個（洗淨，切粒，備用）

紅蘿蔔---1條（洗淨，刨皮，切細粒，備用）

西芹---2條（洗淨，切細粒，備用）

薯仔---1個（洗淨，刨皮，切細粒，備用）

調味：

海鹽---適量

胡椒粉---適量

Tabasco辣椒水---適量 (可增加少許辣味，怕辣可以唔加）



做法：
美顏排毒瘦身雜菜湯
(食譜來源: Miss Jubie 自己食譜)
http://hk.myblog.yahoo.com/miss-jubie/article?mid=41270

1. 注滿一煲水約8-10碗，加所有已準備材料入煲內，水滾後，蓋蓋後用中火煲1個鐘（其間可用一隻筷子晾起蓋邊，防止湯滾瀉）

2. 煲1個鐘後，明顯湯少咗，菜亦已經開始淋，此時可較小火慢火煲4個鐘（如有需要，可以略加少許清水）

3. 4個鐘後，會見到紅蘿蔔，薯仔都而經淋晒，咁就可以步入最後階段，灑入適量海鹽，胡椒粉，tabasco，拌勻後，可略煲多一陣，然後適熄火，上碗，完成！

（如果用高真空保溫煲仲方便，一煲滾就即入真空煲，有佢自己煲成晚，通常我會煲兩晚，啲菜淋啲效果更好）

反斗女皇
Sept 23, 2011 （小公主28個月7日大）
http://hk.myblog.yahoo.com/jubie317/article?new=1&mid=41254


Miss Jubie近排都冇咩時間寫Blog，所以到咗今日先有機會update.....
其實下篇我都想Post吓食譜，係美顏瘦身雜菜湯，記得早排有個Blog友仔問過想要食譜，於是就煮咗呢個湯，但因為未執好相，所以就等下篇先Post到.....



今個標題係反斗女皇，冇錯，當然係講緊小公主啦，可能太多人錫佢關係，最近覺得小公主開始似寵生嬌，有持無恐，放肆無道....

最近小公主有一個唔好嘅習慣，就係郁啲就瞓街典地，個地有幾污糟都好，佢一唔滿意就會扒地瞓街同典地，賴死唔起身...... 呢次真係唔知點算！

上星期就係去行Shopping Mall，小公主可能撞正瞓晏覺時間，想抱佢邊行街邊氹佢瞓，偏偏就同你玩對抗，唔肯抱，唔肯行，仲要一入店舖門口，就即要拖你手拉你出去，唔出咩？就即瞓地俾你睇，唔信？有VIDEO俾你睇！問你死未？

不過，亦有可愛嘅地方，小公主最近學唱歌，"Twinkle Twinkle Little Star" 係佢其中一隻飲歌，不過只會識唱每句嘅最後一隻字，真係睇到笑死你！

仲有，小公主最近有一個嗜好，就係專揀我啲鞋著，人仔細細就鞋大大，行步路都一仆一碌咁，真係好攪笑，下次影到相再POST上黎同大家分享。

與同事敘餐

Sept 9, 2011
http://hk.myblog.yahoo.com/miss-jubie/article?mid=41210

Miss Jubie一向都冇postT外出用饍嘅相，但今日例外。
因為今日食嘅野太吸引我，所以要Post一Post，作為留念，日後回味一番。

今日有咩特別呢？其實冇咩特別，與同事外出敘餐食Lunch，每月都會有一次，因為公司業績好，我哋就會有一餐食，今日我哋去食意大利菜。

啲菜名我已經唔係好記得，不過下次我再睇番個Menu，我就會記得係咩.....


呢杯 "Sunset" 係我叫嘅，有芒果汁，菠蘿汁同另外一個果汁溝埋一齊，
因為我鍾意飲芒果汁同菠蘿汁，所以我點咗呢杯野....


而我個同事就點咗呢杯番茄汁，亦都係我嘅至愛，所以我都影低佢。



仲有呢個係魷魚圈，上面淋咗啲番茄汁，仲有啲黑橄欖，呢個我鍾意食。



仲有呢個超薄PIZZA.....



當然要講吓我呢個Main Course啦，不過我真係唔記得個菜名，只知道係用牛扒整嘅....



而呢個甜品，我就最愛嗰舊TIRAMISU......


唔～ 呢餐好正，好滿足，食完飽飽再開工，真係好鬼眼瞓！

然後，我又期待下個月嘅來臨，哈哈哈～～


仲有，遲啲我會帶打令老公再嚟呢度撐檯腳

玩具反斗城

Sept 1, 2011 （小公主27個月16日大）
http://hk.myblog.yahoo.com/miss-jubie/article?mid=41173


Miss Jubie近日覺得小公主又大個咗好多，個樣正經咗，冇咁BB樣喇。啲手板腳板都大咗一大截。真係好唔捨得佢BB嗰陣咁可愛。





上個星期，帶咗小公主去行玩具反斗城....



Miss Jubie最愛帶小公主去玩具反斗城，因為嗰度亦都係Miss Jubie以前細個嗰陣最愛去嘅地方。而媽咪爹哋通常只會帶我同我妹妹去尖沙咀海運嗰間玩具反斗城。（即係而家嘅海港城）







而家，就由我帶小公主去玩具反斗城喇，一去親玩具反斗城，就好似發咗癲咁（係小公主，唔係我呀！），小公主第一件事就係走去搵車仔坐，而我同老公就一路行，小公主就一路坐住架車仔一邊玩同一邊睇玩具，睇見佢開心個樣就諗起自己細個嗰陣....



之後就去咗行傢俱舖，點知隻死野唔肯行，唯有坐一陣再行過.....







最近，小公主最愛嘅玩具係"Mega Bloks"...又係爸爸買俾小公主玩架！

鹹酸菜雞絲湯米

(食譜來源: Miss Jubie 自己食譜)
http://hk.myblog.yahoo.com/miss-jubie/article?mid=41110


某日，Miss Jubie喺茶餐廳食早餐，食咗一碗叫鹹酸菜肉絲湯米，就係因為材料係用鹹酸菜，加上係用米粉，所以Miss Jubie一見到呢個鹹酸菜肉絲湯米，就好想叫一碗試食。

話明係鹹酸菜肉絲湯米，當然呢碗湯米一定係鹹鹹酸酸架啦，所以就係因為咁嘅原因，特別覺得醒胃！

既然食過好味，當然自己都要試整，唔駛吓吓恨食嗰陣要仆落街食，材料平又易搵，加上打令老公都啱食，所以呢排呢個湯米我都煮得好密。有時配用雞絲，有時配用牛／豬瘦肉絲，不過我自己最愛都係配用豬瘦肉絲多啲。



材料:  (4人分) (包括：Pack返工 x2)
鹹酸菜雞絲湯米
(食譜來源: Miss Jubie 自己食譜)
http://hk.myblog.yahoo.com/miss-jubie/article?mid=41110

超力米粉---大半包

鹹酸菜---1包（通常1包1舊，要洗淨，抹乾，切絲）

去皮雞肉（髀或胸）／瘦肉（牛或豬）---1磅（洗淨，抹乾，切絲）

醃肉：

生抽---適量

老抽---適量

海鹽---少許

糖---少許

生粉---少許

胡椒粉---少許

米粉湯底：

史雲生清雞湯---1罐
或改用雞粉都可以



做法：
鹹酸菜雞絲湯米
(食譜來源: Miss Jubie 自己食譜)
http://hk.myblog.yahoo.com/miss-jubie/article?mid=41110

1. 開鑊煲水，水滾後加入米粉，煮熟後撈起，用凍水過冷河，瀝水，備用（用意令米粉爽口）

2. 開鑊，猛火，加油，油滾後，放入已醃好肉絲，炒至8成熟，放入鹹酸菜絲，兜至肉絲完全熟透，撈起，備用

3. 開鑊，加入史雲生清雞湯，再略加半罐水，滾後加入已熟米粉，煮滾後，上碗，再鋪上鹹酸菜肉絲連汁，最後淋上雞湯，完成！

兩父女的新玩具

Aug 14, 2011 （小公主26個月，29日大）
http://hk.myblog.yahoo.com/miss-jubie/article?mid=41087

星 期六朝早，Miss Jubie同小公主一起身，就見到爸爸拎住一盒遙控玩具車，等小公主起身一齊玩，原來爸爸見小公主好鐘意卡通電影反斗車王2（CARS 2）中嘅車車，於是就趁某日得閒，去咗玩具反斗城買咗呢盒玩具遙控車返嚟，氹小公主開心！呢個爸爸真係好錫小公主.....



小公主一起身，頭又未梳，面又未洗咁，個咀仔仲有飲夜奶嘅漬喺度，超級核突，但一見到爸爸，就啜咗一啖落爸爸度，爸爸就咁，俾咗盒玩具俾小公主拆開。



小公主超級興奮，用極速時間拆咗出嚟，跟住兩父女就好認真咁研究呢個玩具點玩。







就係咁拆咗出嚟，就玩足成個朝頭早.....

收到喇

July 26, 2011 （小公主26個月，10日大）
http://hk.myblog.yahoo.com/miss-jubie/article?mid=40992

Miss Jubie終於收到ｍｉｌｋｋｉｄｓ 寄嚟嘅衫仔，啲衫仔好抵好得意，有時平平哋，買俾小公主著都係唔錯嘅選擇。



之前幫襯過ｍｉｌｋｋｉｄｓ 買咗啲可愛襪仔，當然而家小公主大個咗咁多，一早已經唔啱著.....

而家有以下呢啲衫......





呢條裙仔係我最鐘意嘅！



仲有呢件Jacket，呢個粉紅色好Sharp！



仲有呢幾對襪仔都好鬼Cute！睇上去好似真係著咗對鞋咁！



大家有興趣都可以去ｍｉｌｋｋｉｄｓ睇吓架～

睡公主

July 17, 2011 （小公主26個月，零2日大）
http://hk.myblog.yahoo.com/miss-jubie/article?mid=40772

Miss Jubie都好耐冇Post小公主啲Video，今次影咗呢個Video，'打令'老公話得意，叫我post上嚟同大家分享吓～

 

其實當時小公主因為啱啱食完Lunch，又飲飽奶，所以飯氣攻心，加上又到瞓晏覺時間，所以一放上Shopping Cart，就已經瞌晒眼瞓，結果係瞓咗成粒鐘，到我哋買完野先識起身，又做咗睡公主！哇哈哈哈～～





另外，前兩日去咗美食節，見到有檔用紙撈魚嘅檔攤，姨姨見幾得意，就買咗三次紙撈，俾小公主玩吓，於是就同婆婆一齊撈，結果當然一條都撈唔到，檔攤姐姐都送咗幾條魚仔俾小公主做安慰獎。美食節買咗兩餅蠔餅，同兩盒臭豆腐，因為後尾太人迫，所以就決定走人喇～













第二日，就去咗食魚生！哇！好好味！哈哈哈～ 唔信，你哋睇吓，幾正？！呵呵呵～～～

馬來風味炒飯

(食譜來源: Miss Jubie 食譜)
http://hk.myblog.yahoo.com/miss-jubie/article?mid=40857


Miss Jubie近排都好懶，好耐冇寫食譜，雖然都有煮野，但都煮少咗好多，同埋通常都煮啲平日都常煮嘅菜式，所以冇影相，因此都冇必要寫食譜啦。（因為我都介紹過）
今次就貪方便，買咗樽楊協成馬來風味炒飯醬嚟炒冷飯（因為有時食剩咗啲飯，留嚟做炒飯就啱晒。）有時簡簡單單又一餐，真係唔錯。經過今次之後，知道小公主原來似足打令老公，兩個一樣咁鐘意食炒飯！









材料:  (4人分) (包括：Pack飯返工 x2)
馬來風味炒飯
(食譜來源: Miss Jubie 食譜)
http://hk.myblog.yahoo.com/miss-jubie/article?mid=40857


薑---8片（切成米粒狀Size）

冷飯---3嘜（約7-8碗冷飯）

雞蛋---2-3隻 (打散)

粟米粒---1/3罐

蟹柳---8條（切粒）

磨菇片---1/3碗

青蔥---兩條（切粒）



調味：

海鹽---適量

楊協成馬來風味炒飯醬---約大半樽




做法：
馬來風味炒飯
(食譜來源: Miss Jubie 食譜)
http://hk.myblog.yahoo.com/miss-jubie/article?mid=40857

1. 燒紅個鑊, 加油, 落1/3蛋漿, 用鏟打圈兜幾下, 見呈半熟狀態就加入冷飯兜勻; 加少少鹽調味略炒, 跟手又再落1/3蛋漿兜勻冷飯至乾身; 熄火後又再落最後1/3蛋漿兜勻至冷飯乾身及沾滿蛋漿為止

2. 加入薑米粒，略兜，再加入楊協成馬來風味炒飯醬約半樽，炒勻

3. 再加入各種材料：粟米粒，青蔥粒，蟹柳粒，磨菇片，然後兜勻。

4. 試味，如發覺唔夠鹹，再加入適量海鹽，如發覺炒飯醬唔夠濃味，可在多加少少，即至味道合適為止，兜勻後即可上碟，完成！

戒咗喇

July 7, 2011 （小公主25個月，21日大）
http://hk.myblog.yahoo.com/miss-jubie/article?mid=40772

Miss Jubie呢排公司工作比較忙，所以返到屋企都好累，唔想寫Blog，見今日好啲，可以抽少少時間講吓小公主近況。

有個好消息同大家分享，小公主終於戒甩咗個奶咀喇，數落都冇食兩個幾禮拜，多得一個姨姨幫手。

話說，兩個幾禮拜前，Jess姨 姨車我同小公主去街街，去行街嗰陣，撞到JESS姨姨嘅朋友嘅朋友，呢位姨姨見小公主兩歲都未戒甩奶咀，就暫做衰人搶咗小公主口中嘅奶咀，話要留俾佢個 BB仔食，但係小公主見佢咁惡，就唔敢問佢拎返，就係咁，呢個姨姨，趁小公主唔覺，就暗中俾返個奶咀我，之後，我哋就咁道別，走咗。

當小公主要扭食奶咀，我哋就同佢講：
"你已經冇咗個奶咀喇，你唔記得俾個姨姨搶咗咩？佢話佢要留俾佢BB食丫嘛，你冇架喇！"

頭兩次都有喊住要食返，但我就話等下個星期再見到呢個姨姨嘅時候，先再問佢俾返我哋啦。

就係咁，過咗一個禮拜，佢開始慣咗，最後就咁戒甩咗喇！

四格漫畫：交換電話號碼

June 18, 2011 （小公主兩歲，兩個月零2日大）
http://hk.myblog.yahoo.com/miss-jubie/article?mid=40634

Miss Jubie好耐冇整四格漫畫，今日見得閒，又有好題材，就整吓呢單野出嚟俾大家笑吓先～



兩個小朋友就係咁樣出事～ 哈哈哈哈～～～

(其實單野純粹老作，唔好當真！哈哈哈～)

出嫁

June 18, 2011 （小公主兩歲，兩個月零2日大）
http://hk.myblog.yahoo.com/miss-jubie/article?mid=40607

Miss Jubie個好細妹終於出嫁，喺佢出嫁前一個星期，我已經緊張到不得了，個心成日蘿蘿亂，成日心不在焉，返工日日等放工，好辛苦先挨到星期六，終於個妹就咁嫁咗出去～








心情其實係開心，但係亦有少少酸溜溜嘅感覺，好唔捨得佢嫁，但諗深一層，都大個女喇，嫁咗做人老婆，都係好事～











呢個大日子，除咗我要做主人家，幫手招呼親朋戚友，最大責任係做攝影師，會跟足成日，當然我仍然會係做BACK UP嗰個，而且亦有兩個專業攝影師喺度坐陣～









連三朝回門都同一日做埋～ 真係累死人......







攪咗成晚喺度EDIT啲相，終於整好晒！可以俾對新人去曬相派俾人喇～

 

祝阿妹同妹夫：

新婚生活愉快！

 

有啲擔心

June 11, 2011 （小公主兩歲26日大）
http://hk.myblog.yahoo.com/miss-jubie/article?mid=40486

Miss Jubie近日有啲擔心小公主嘅語言發展.....

事情係咁，上個月（五月中），去帶小公主睇兒科醫生做例行檢查生長情況，通常每次都會有一張表要填，係關於了解小公主目前各項發展嘅進度，係咪跟得上其他同齡小朋友進度，其中一項問及：

你的小孩是否已經能夠講出簡短的句子來表達自己需要？

成張紙成廿幾條問題，唯獨呢條我係答：否

因為的確小公主仲講緊單字或複語(例如：車車，抱抱，曳曳（即係奶奶）講唔正，或者係一論咀講一啲我哋聽唔明嘅BB話！

入到病房見醫生，醫生巡例都問啲問題，其中都有問呢條：

醫生話： 小公主而家識講一句句子未？唔係嗰啲兩個字嗰種

我同'打令'老公都係答：未

跟住醫生話: 唔緊要，或者遲啲睇吓點先算....

跟住冇講下文，我就冇理







尋日，托兒所又係問我以下問題：

老師話： 究竟小公主喺屋企講咩話？

我答： 有時英文，有時中文。

老師話：咁小公主講唔講到一句簡單嘅說話？

我答：我自己就真係唔多覺，最多係答：抱抱，爸爸，或爸爸抱，又或者係：YES，NO，FIVE，又或者係一輪咀講野，講咗好多野，但冇一隻字聽得清楚，有時感覺唔似英文或中文！但爸爸有時就話聽到係中文，內容都估到係咩...

老師話：咁而家起，你要留意多啲小公主，因為同齡或細佢一個月嘅小朋友，已經識得講到一句句嘅簡單句子，而小公主仲未開始講到，所以觀察一段時間，如再冇進展，要睇吓醫生尋求方法改善！

佢一咁講，我就個人就心蘿蘿亂，心諗：唔通小公主有語言障礙？唔係呱？唔好嚇我呀！

心煩嘅事，暫時放低，咁講吓上星期去郊遊樂先！


首先姨姨揸車車咗我哋同公公婆婆去咗IKEA食早餐先.....





然後去咗一達地方郊遊樂....







嗰度好多狗狗喺度同主人散步，小公主一見到狗狗就興奮到發晒癲，係咁指住啲狗仔，走去公公身後叫狗狗，又要叫，又要跳，但又要驚，又要想行埋去，睇到我哋笑到扒地！



小公主而家跑得好快，有時真係轉個身就跑到好鬼死遠！



去完郊遊樂，就去買咗3打生蠔返屋企食.....