新玩具

November 14, 2009 （小公主5個月3個星期零6日大）

Miss Jubie發覺最近小公主開始口痕痕又手多多，尤其是同佢沖涼嗰陣，可能小公主冇耐性同悶，所以係咁捉住啲就手嘅野嚟咬..... 於是，Miss Jubie決定去買玩具俾小公主可以喺沖涼嗰陣玩～





今日拎架車出去換油，坐喺到等咗足足3個鐘，悶到發癲，於是又同小公主影相打發時間.....













整完架車順便去SHOP一陣，終於有所收鑊，就係買咗以下嘅野：

BB洗頭沖涼液+BB專用泡泡浴露

BATH TOYS

學習筷子

就係咁，一返到屋企就立即拆出嚟試玩，小公主好專注咁玩呢個BATH TOYS，連我嗌咗佢好幾次都冇理過我.......









 (閱讀全文)

韓國炒粉絲 （Japchae）

(食譜來源: Miss Jubie自己食譜)

 

http://hk.myblog.yahoo.com/miss-jubie/article?mid=28218

呢個韓國炒粉絲其實Miss Jubie都整過幾次，但一直都冇影同POST過食譜，因為太多準備功夫，每一次都的唔起心乾去整理啲相，近日見冇咩食譜出，就整呢個啦～
每次整襯呢個菜式，都會整到成屋好香麻油味架～





材料: (4人份量)

洋蔥---半個 （洗淨，抹乾，切絲）

甘筍（細細粒生食都得果種）---10粒 （洗淨，抹乾，切絲）

紅椒---1個（洗淨，抹乾，去囊，切絲）

黃金椒---1個（洗淨，抹乾，去囊，切絲）

雪花肥牛肉---1 包

花菇---6粒（洗淨，用熱水浸至發大，切絲）

韓國粉絲---半包 （約250G）

蒜頭---4瓣 （拍扁，去衣，切成蒜粒）

青蔥---2條 （洗淨，抹乾，切段）

芝麻---適量

韓國粉絲

調味料：

醬油---適量

胡椒粉---適量

味琳---適量

麻油---少許 （最後先落）



做法：

1. 先將洋蔥，甘筍，紅椒，黃金椒洗淨，抹乾，切絲； 花菇洗淨，用熱水浸至發大，切絲；青蔥洗淨，抹乾，切段；蒜頭拍扁，去衣，切成蒜粒，備用

2. 煲滾水，放入韓國粉絲後轉細火加蓋煮6至8分鐘，熄火，撈起用冷水過冷河，直至韓國粉絲完全冷卻，瀝乾，備用

3. 燒紅個PAN，落油，轉中火，先爆香蒜粒及洋蔥，依次序加入甘筍絲，紅椒絲，黃金椒絲及花菇絲，略兜，再加入雪花肥牛肉，略兜，然後將所有調味料混合，一 齊倒入PAN中煮至肥牛肉變九成熟，加入青蔥段段，再加入已瀝乾嘅韓式粉絲，然後將所有材料完全地撈勻，最後加上少許麻油及芝麻，完成～

放監一日遊

November 10, 2009 （小公主5個月3個星期零4日大）


點解今次個標題係"放監"呢？因為我想出街丫嘛～ 你哋知嘛, Miss Jubie成日困喺屋企好鬼悶架！ 我就嚟喺屋企悶發霉喇.....  但"打令"老公要返工，連星期六都要返，得星期日先放假，但"打令"老公又用埋嚟瞓覺 （因為實在太累，有時仲要開O.T.） 所以 Miss Jubie唔係個個星期日都有街去，真係好慘架～～ 以前冇BB，去邊就自己楂架車周圍去.....而家想出去？ 一諗起要帶埋個女，就打晒推堂鼓..... 冇法啦，每當諗起行行吓街，行得好興起，忽然小公主扭計要換片片或要飲奶奶，就要立即周圍搵育嬰室換片真係好鬼煩，有老公喺度就話可以多個人幫手，如果自己一個人就真係LE咁HEA喇.....





不過Miss Jubie而家真係放監喇，因為每逢星期六，我細妹同我媽咪就會車我同小公主出嚟透吓氣，放鬆吓心情，盡情去SHOPPING，不知幾咁開心～









November 7, 2009 （小公主5個月3個星期大）果日Lunch去咗買日本刺身同飯糰食，之後去咗行商場，行吓H＆M，又行吓玩具部，小公主見到啲玩具，樣樣都覺得好新奇，於是樣樣都摸吓.....









見到"怪獸公司"(Monsters, Inc) 果隻怪獸 "James P. "Sulley" Sullivan" 竟然係咁摸到愛不惜手，於是姨姨二話不說就買咗呢隻咁大嘅怪獸俾小公主喇～ 仲有婆婆又買咗個新奶咀同牙膠俾小公主咬，小公主真係好幸福！

學識 "Bu" 口水

November 9, 2009 （小公主5個月3個星期零3日大）

霎 吓眼，下個星期三就係小公主半歲大喇，呢半年真係轉眼間就過。唔知係唔係Miss Jubie過得太過充實呢？時間真係過得特別快～ 老實講，其實Miss Jubie日日咁照顧小公主真係好忙同好悶，犧牲晒我上網，睇戲，SHOPPING，同煮野嘅時間，連買衫買手袋同化粧品都買少咗好多，每次去行街明明想 買自己野，但結果都係買咗小公主嘅野。冇法啦，我太愛我呢個女喇～～ 日日睇住佢一日一日咁變大，又一日一日咁學識唔同嘅事物，真係好有趣～







不過有時佢一扭計發牙痕又牙肉痛果陣，我就會頂唔順，因為小公主24小時不停喊，不停嗌，唔肯食奶，唔肯瞓覺，真係好惡頂，結果我忍唔住搵咗我老公發脾氣！

老公就會話： "BB發牙痕梗係會咁架啦，俾啲耐性啦..... "

（冇錯，我的確係一個好冇耐性同冇乜EQ嘅人，哈哈哈！）









有時諗返起，老公要返工，放工返嚟已經好累，但因為我發脾氣而令佢冇覺好瞓都覺得自己好唔啱～ SORRY啦，老公，我盡量學俾多啲耐性啦～




小公主出世到而家，一直都好鐘意沖涼洗頭，完全唔怕水入眼，平時我都係用盆仔同佢沖涼洗頭，有時又會用花 灑，但最近小公主實在重咗好多，而且開始坐唔定，成日腳撐撐，我真係捉唔穩怕會浸親佢，所以又去咗玩具反斗城買咗呢個浴缸用嘅BB坐椅，小公主而家沖涼洗 頭都冇問題喇，點撐都得喇，我唔駛怕會浸親佢喇～



小 公主最近學識"Bu"口水，仲成日係咁"Bu"，真係周圍都係佢啲口水！一早瞓醒第一件事就"Bu"口水，食完奶又"Bu"，換片片又"Bu"，去街街又 "Bu"，食糊仔又 "Bu"，食奶咀果陣都 "Bu"，真係大件事，早知唔教佢 "Bu"口水啦，今次真係唔衰囉嚟衰！！！

 

蒜鹽煎三文魚扒

(食譜來源: Miss Jubie自己食譜)

http://hk.myblog.yahoo.com/miss-jubie/article?mid=28009

Miss Jubie又病咗喇，呢排天氣真係好易令人病，繼早前感冒，今次作傷風，好彩傷風及時制止，但咳就咳成咗！日頭就仲好啲，冇咳得咁厲害，但到夜晚就真係咳到甩肺，食咳藥水都冇用，好辛苦～



講返呢個蒜鹽煎三文魚扒先，呢個菜式其實我成日都整，不過竟然未POST過食譜出嚟，今日就POST出嚟同大家SHARE，其實咁樣整，真係好好味，簡簡單單又一味喇～





材料: (2人份量)

三文魚扒---1 塊（洗淨，抹乾）

蒜鹽粉---適量

黑胡椒粗粒---適量

卡夫奇妙醬---適量

檸檬---1/8瓣



做法:

1. 將三文魚扒洗淨，抹乾，用適量蒜鹽粉及黑胡椒粗粒醃好，備用

2. 燒紅個Pan, 轉中火，落油, 放入三文魚扒，煎至兩面變金黃色，然後上碟, 備用

4. 最後可以灑上檸檬汁及沾上卡夫奇妙醬伴食，完成～

TRICK OR TREAT

October 31, 2009 （小公主5個半月大）

今 年係小公主第一次過Halloween，早前Miss Jubie買咗一套米奇老鼠嘅衫，打算俾小公主Halloween扮Micky Mouse去拎糖果陣著嘅，但係結果到最後都冇去拎糖，因為天氣轉涼，加上H1N1實在太厲害，我同小公主屬高危一族，而小公主又未夠6個月，唔打得 H1N1流感針住，結果當晚都係留喺屋企渡過咗呢個萬聖節～～～

大個女

October 29, 2009 （小公主5個月13日大）

小公主已經5個月13日大喇，呢隻衰豬自從學識用手拎野之後，而家成日手多多，咩都用手去摸，去拎。見到啲新奇嘅野，會先望一輪，然後會用手去摸摸，啱心水就會立即放入口咬！所以我一定要將所有野抹一次／消毒一次先可以俾小公主玩。







而家好叻呀，只要輕輕扶著佢，小公主就可以企得好直，腳骨力真係幾好～ 不過自己坐著時，仲未可以伸直腰坐，爬地下時，仲未識郁向前，只係可以360度旋轉～ 最好笑係，每當抱起佢，對腳會靠差咁撐，好似跳芭蕾舞咁，好鬼Cute！







而家小公主會周圍望，識得認人，同埋見到郁嘅物件，對眼同頭仔會跟住件物件郁，好好笑～









我而家泵唔夠人奶喇，我諗過多一排就會回奶。所以開始要用奶水代替人奶，而家小公主會慢慢改食奶水同米糊，而家每日食五餐，只有一餐食人奶。











小公主而家一喊，就會自動識得叫媽咪同爸爸（只限喊果陣），平日叫佢叫，死都唔肯講！

香茅煎雞翼

(食譜來源: Miss Jubie自己食譜)

http://hk.myblog.yahoo.com/miss-jubie/article?mid=27456

Miss Jubie嘅感冒終於完全好番，但竟傳染咗俾"打令"老公，今次真係大件事！呢兩日唯有煲粥俾"打令"老公食啦～

今 次食譜講香茅煎雞翼，呢個係前幾日整嘅小食，因為我前幾日感冒，所以晾到今日先有心機執相Post出嚟。呢個香茅煎雞翼當小食又得，當晚飯菜式都可以，夠 方便～ 不過，我只係嫌啲李錦記香茅醬唔夠入味，所以每次我都會用鹽及胡椒碎粒醃一醃啲肉類先，另外，啲香茅味唔夠香濃，所以，我自己都會額外加多啲香茅碎落去。










材料: (2人分)

雞中翼---20隻

急凍香茅碎---1 tablespoon

李錦記香茅醬---50g

鹽---適量

胡椒碎粒---適量



做法：

1. 先將雞中翼洗淨抹乾, 加入鹽及胡椒碎粒攪勻，略醃

2. 再加入李錦記香茅醬攪勻，將其放入保鮮袋封好，放入雪櫃醃一晚，備用

3. 將GRILL PAN用猛火燒紅，加油後轉用中小火，慢慢逐隻雞翼放入，不時要將雞翼兩面反下, 煎至兩面都變金黃色，及確保兩面都熟透（呢個步驟要俾啲耐性，唔好心急，唔好貪快用猛火煎，用太猛火會令雞翼變焦但內裡雞肉仍然生嘅情況出現）

4. 當香茅雞翼完全熟透後，熄火，將香茅雞翼逐一排好於碟上，完成～

自己碌 +自己放入口咬

October 20, 2009 （小公主5個月4日大）

呢單野係喺 October 20, 2009 （小公主5月4日大） 時發生...

















Miss Jubie 因為天氣轉季，唔小心冷親，患上感冒，足足病咗幾日，連續食咗三日皮蛋瘦肉粥，Miss Jubie去咗媽咪度住咗一日，事關最病果日，老公第日要開O.T.，唔可以照顧我，唯有送我同小公主寄居媽咪家一晚，小公主有婆婆，姨姨同公公輪流照 顧，而我就要同小公主隔開房，乖乖專心養病～







Miss Jubie而家好返晒喇，但前幾日因為病到冇力，一直都冇乜點泵過人奶，所以小公主呢幾日都冇飲過人奶，飲嘅全部都係奶水，不過，好彩佢都肯食，冇扭計...... 而家又少奶喇，我要飲返多啲木瓜煲生魚湯先得喇！











小公主5個月大，真係識野都快啲，呢次發現小公主學識自己放奶咀入口食，識得拎起鐘意嘅野放入口（咩都放，連電視remote都唔放過），仲有識得自己碌出嚟，你哋自己睇片啦～

澳門豬扒包

(食譜來源: VDONext V壹網 私家廚房＜專輯＞3點3小食經典茶餐廳系列)

miss jubie's 做法：

http://hk.myblog.yahoo.com/miss-jubie/article?mid=27053

Miss Jubie 其實好痕食澳門豬扒包，兩年前去過澳門玩一次，順道去食澳門弛名嘅豬扒包，點知去咗間唔好食嘅舖頭食豬扒包，結果失望而回。尋日上網四處睇 website，無意中睇到呢個website教人點整澳門豬扒包，當然要立即試試啦，趁小公主瞓咗，開壇作法！！！





今 次自己整，好滿意，而且完全唔難整，仲好好味！呢個食譜可以整到四份澳門豬扒包，我自己食1份，老公食1份，另外兩份俾老公第日帶返工做lunch。佢帶 返工，放lunch果陣，啲同事見到，個個投射羨慕目光，撐大個口得個窿，話佢份lunch好正，佢放工返嚟話我知，攪到我都不知幾咁開心～～～ 哈哈哈～





材料: (4人份量)

豬扒---4 塊（洗淨，抹乾，去骨，用刀背啄鬆）

生菜---4 塊

蕃茄---1 個（切片）

法國麵包---1 個 (切成4段)

粟粉---1 teaspoon

乾蔥---1 teaspoon

鹽---1／2 teaspoon

糖---1 teaspoon

雞粉---1／2 teaspoon

胡椒粉---少許

豉油---1 tablespoon

油---2 teaspoon

清水---4 tablespoon

沙律醬---適量



做法:

1. 將豬扒洗淨，抹乾，去骨，用刀背啄鬆

2. 先用水及粟粉撈落豬扒；及後再將乾蔥，鹽，糖，雞粉，胡椒粉，豉油逐一撈落豬扒；最後落油，撈勻醃30分鐘，備用

3. 生菜洗凈抹乾，蕃茄洗凈切片，法國麵包切成4段，備用

3. 燒紅個Pan, 轉中火，加油, 放入豬扒，煎至兩面變金黃色，然後夾起, 備用

4. 將法國麵包切開，按次序鋪上生菜，蕃茄片，豬扒，沙律醬，最後用竹簽桔插好，完成～

奪命煩音食奶咀

October 11, 2009 （小公主4月25日大）

呢單野係喺 October 11, 2009 （小公主4月25日大） 時發生...



Miss Jubie 呢兩日又忙返喇，皆因小公主最近唔知係咪又到厭奶期呢？唔肯食奶，成日喊.....



定係佢又想再出啲啲牙仔呢？成日瞓埋啲蚊子覺，唔夠15分鐘就醒，想做吓自己野Relax吓都唔得.......



最近小公主仲玩狂嗌，高八度音咁嗌，好似啲音波功咁，簡直係奪命煩音，真係好想塞住佢把口......



有日婆婆同姨姨帶小公主出街，小公主係咁扭計，不停咁喊，食奶又唔係，換片又唔係，眼瞓又唔係，點攪都唔掂，於是去咗玩具反斗城買咗呢個奶咀俾小公主食，實行塞住佢把口，結果...... 掂晒!!! 噢～～～ 我對耳，舒服晒！～～～～

學坐+玩腳趾

October 7, 2009 （小公主4月21日大）

呢單野係喺 October 7, 2009 （小公主4月21日大） 時發生...

而家啲post終於算叫做追得上喇，發生嘅事相差唔夠一個星期，Miss Jubie update進度算唔錯喇呱！哈哈哈哈.....





小公主最近呢個星期又學識咗好多野.... 學識玩腳趾，學識坐一陣好短時間，學識尖叫，學識睇電視（雖然睇電視對BB對眼唔好，但睇一陣，可以令小公主靜落嚟，我會選擇俾佢睇一陣好短時間嘅卡通片）









小公主越大越可愛，有好多人見到佢都話佢似日本BB女，老實講，我自己都覺得，可能小公主皮膚夠白，夠滑，頭髮又有小小攣毛，所以係有啲似日本人～







其實小公主皮膚好，可能同我成日都有飲鮮奶有關，而小公主亦都同飲人奶有關。



前排，我諗係我食錯野出事，起初以為飲咗特大杯黑豆漿出事，最後原來係我食錯咗菠菜出事，所以攪到差啲回奶.... 後尾搏命叫媽咪煲木瓜魚湯同食三文魚先叫好返啲，但係都冇之前每4個鐘泵到150ml咁多，得返30ml咋，真係驚到我死，就算食完魚+木瓜魚湯後，都係 得80ml，都係唔夠，咁點算呢？小公主每餐要食180ml-210ml奶先夠，於是我就迫住要餵奶粉，點知食咗一個星期，小公主塊面啲皮膚變得好差，仲 出紅色粒粒添，所以我知道就係啲奶粉太燥出事喇，於是立即停食，改用奶水，奶水就好好多，不過長期咁食唔係辦法，因為啲奶水都唔平.... 所以呢個故事教訓我，千祈唔好亂食野，尤其是淡豆豉，菠菜，乳鴿，花旗蔘，人蔘，韮菜同埋豬潤！





於是就去買天然健康食品嘅地方買咗一樽Blessed Thistle 同Fenigreek 食 (醫生建議），每餐各食3粒丸，嚟幫助我增加人奶奶量，結果兩日就有好轉，而家又可以泵到140ml喇！真係好彩～ 所以真係千祈唔好食錯野，尤其係黑豆，豆豉果啲！





小公主自從學識反身，而家就好鐘意扒喺度瞓，我同老公成日幫反身，唔夠一陣，佢就反身扒返喺度，除非小公主瞓得好淋就一直平瞓，如果唔係真係要每隔15分鐘就要check一check佢同幫佢反身，以免怕佢焗死.... 而家連枕頭仔都唔敢俾佢用呀....

蒜香三文魚芝士撈意粉

(食譜來源: Miss Jubie自創食譜)

http://hk.myblog.yahoo.com/miss-jubie/article?mid=26710

Miss Jubie 前兩排喺超級市場見到啲罐裝水浸三文魚罐頭減價，所以就買咗3罐，留嚟有需要時用，今次用得着喇～



今次貪方便，整咗呢個意粉，就用咗呢個罐裝水浸三文魚罐頭整，我自己都覺得味道唔錯，但"打令"老公就嫌我今次整呢個意粉太乾冇汁撈。我家少爺鐘意食有汁撈果啲，唔鐘意食乾炒果啲，我呢個少奶奶唯有下次整有汁果啲俾佢嘆啦～ 









材料: (2人份量)

罐裝水浸三文魚罐頭---1罐

蒜蓉---1 tablespoon

Spaghettini意粉---兩紮(2人份量)

Parsley Flakes---適量

牛油---1薄片

蒜鹽粉(Garlic Salt)---適量

鹽---適量

黑胡椒粉---適量

Kraft 100% Parmesan芝士粉---適量



做法:

1. 將罐裝水浸三文魚開罐，倒去所有水份，用少許鹽+黑胡椒粉+Parsley Flakes調味，撈勻，備用

2. 注滿一煲水, 加鹽及少少油攪勻，水滾後放入Spaghettini, 熄火蓋蓋焗(約8分鐘)至Spaghettini熟透, 撈起, 上碟備用

3. 燒紅個Pan, 轉中火，加1片硬牛油, 炒香蒜粒, 加入三文魚, 兜勻後, 先撈起少許三文魚備用，轉細火，及後將餘下嘅三文魚再加入Spaghettini，蒜鹽粉及Kraft 100% Parmesan芝士粉炒勻, 然後撈起, 鋪於碟上備用

4. 將之前留起嘅三文魚鋪上意粉面，灑上適量Parsley Flakes，完成～

Focus on Objects

October 1, 2009 （小公主4個半月大）

呢單野係喺上星期四(October 1, 2009 小公主4個半月大) 時發生...



冇寫一個星期Blog，真係追Post追得好辛苦... 哈哈哈～
冇法啦，鬼叫自己整鬼壞咗部電腦，老公又要返工，放工返到屋企又累到隻積咁，唔得閒幫我整，所以要到星期六，日先得閒幫我整.... 不過湊住隻女，唔係好覺有乜問題，但以前，我冇咗部腦，就等於要我死！～







好，入返正題.... 繼小公主學識反身之後，而家又學識對物件產生興趣，尤其是未接觸過嘅物件，第一次必定望好耐，好似望住果件物件沉思緊咁，好攪消笑，而下一步就會想用手去觸摸.... 最近，小公主愛上咗玩我屋企果部會發光嘅室內無線電話～

Turn Over

September 29, 2009 （小公主4個月13日大）

呢單野係喺上星期二(September 29, 2009 小公主4個月13日大) 時發生...



Miss Jubie終於見證咗小公主第一次學識反身扒喺地下度！原本小公主前一個星期已經喺自己張床仔度學識反身，但係張床係淋嘅，喺地下就未反到，所以唔算數。但今次就真係成功咗啦！Yeah！！！



而家小公主條腰骨實淨咗好多，所以可以坐喺呢個UFO 3號度自己玩喇！呢個UFO 3號前排喺玩具反斗城減價，所以姨姨有忍唔到手買咗俾小公主學坐...







小公主而家學識對事物產生興趣，同時會想用自己對手仔去觸摸，同埋捉實唔放手...

 

第三次打針針

September 28, 2009 （小公主4個月12日大）

呢單野其實已經係喺上星期一(September 28, 2009 小公主4個月12日大) 時發生...



呢次係Miss Jubie第3次帶小公主去打針針～ 今日再食防止輪狀病毒腸胃炎嘅滴滴藥，另外要打兩支針。而家小公主大個喇，唔再去到診所時再扮瞓喇，仲眼仔碌碌四周圍望，睇返上兩個月喺診所影嘅相，小公主真係大舊咗好多！





去 到診所，又係例行做法，先報到，跟住等嗌名，跟住姑娘就帶我哋入房，姑娘同完小公主度身長同頭圍後，就叫我哋同小公主除衫衫磅重重，今次有11磅4安士！ 不過唔知點解，我覺得今次唔夠之前大得咁多同快，係咪我餵得唔夠多呢？？？心裡都係有啲擔心，於是問護士，護士話小公主進度都OK，係理想範圍以內，所以 叫我可以放心，聽完之後，我仲係覺得自己唔係咁安樂，唔知係咪做咗人阿媽，特別係咁嘅呢？哈哈哈！





冇 幾耐，Dr. Lee入嚟喇.... Dr. Lee都係例行檢查，Check吓心跳，Check吓眼仔，耳仔，口仔，喉嚨同啲關節，又了解一吓小公主近呢一個月日常嘅生活及生長進度嘅野～ 問小公主學識反身未，識講野未，有冇繼續餵吓糊仔咁，又問學識拎起啲野未....小公主樣樣都有齊晒，仲多咗一樣野，就係出牙仔，Dr. Lee都話GOOD！







小 公主今次打兩支針針，冇上一次咁痛，喊咗兩吓就冇晒事！哈哈哈！不過食滴滴藥果陣就嘔奶，所以要用奶樽個咀餵，點知都係失敗，因為小公主之前食得太飽，最 後Dr. Lee就PACK好啲滴滴藥俾我哋帶返屋企，等小公主肚餓果陣，餵奶前先餵滴滴藥佢食咗先。唔講咁多喇，你哋自己睇片啦～ Bye Bye～

 

蜜瓜椰汁西米露

(食譜來源: Miss Jubie自己食譜)

http://hk.myblog.yahoo.com/miss-jubie/article?mid=26347

Miss Jubie因為上星期電腦懷鬼咗，所以失蹤咗成個星期，要等打令老公得閒先幫我整，尋日啱啱先整返好，所以今日開始會追post～ 補返上兩個星期嘅事。

今 次先Post蜜瓜椰汁西米露，呢個糖水，Miss Jubie好鍾意食架，細個果陣唔識自己整嚟食，就去惠康買一盒盒果啲現成，一盒有唔知三包定四包，放入熱水浸一陣，就可以開封倒出嚟食，唔記得咩牌子 喇，因為好耐冇買嚟食，因為自己識整啦嘛，我記得仲有摩摩喳喳添，我知道而家仲有得賣架，好，下次我就整摩摩喳喳啦～

我整糖水，以往係用冰糖，不過有時屋企冇晒，我就用砂糖。今次我食唔晒，所以留返碗第二日食.....（因為有4碗份量，我同我老公各有兩碗食，但我就食 唔晒，跟住第日再食另1碗）但有BLOG友話，原來用砂糖整糖水隔夜會變酸，但我自己就真係唔覺得... 不過就算係真，一次半次都冇乜所謂，老實講，反正我整啲野好少可會隔夜，因為我老公一定會同我清晒～ 所以其實對我嚟講，用冰糖或砂糖整都冇乜所謂～



材料: (2人份量)

蜜瓜---1/4個 （切粒）

西米---1/2杯

椰奶---1/2杯

花奶/Whipping cream---1/3杯 （今次我用咗Whipping cream，覺得比起用花奶更滑，更濃奶味）

冰糖/砂糖---2 Tablespoon （今次我用咗砂糖，因為屋企用晒冰糖）

水---1 1/2杯




做法:

1. 將1/4個蜜瓜切開，去囊，去皮，切粒, 備用

2. 煲滾水放入西米, 煮 10 分鐘, 熄火, 焗 20 分鐘或至完全透明, 再將已焗熟嘅西米過泠河（作用係要將膠質洗去）, 備用

3. 煲滾水, 再放入砂糖煮溶, 加入椰奶煮滾, 熄火

4. 加入Whipping cream及西米拌勻，倒入碗內

5. 最後加入蜜瓜粒，完成～ （可熱食或凍食，我個人認為雪凍後食味道更好！）

雙眼皮

September 27, 2009 （小公主4個月零10日大）

自 從小公主出牙仔之後，Miss Jubie就再冇安寧嘅日子過喇，因為小公主成日都發憫憎，不停咁流口水，又成日將成隻手啲手指係咁塞落個口度，係咁發憫憎挖挖挖，又唔肯瞓，又唔肯食， 真係冇晒符...... 用埋電動按摩牙肉機都冇乜用，睇嚟，真係要買果啲雪得入雪櫃嘅牙膠俾佢咬先得喇.....





小公主真係大得好快，而家每隔兩個星期就個樣變大個咗，之前因為一直眼腫，所以完全睇唔到對雙眼皮，但呢兩三日，對眼突然消退咗啲水腫，所以對雙眼皮終於出現喇～ 不過隻左眼時腫時唔腫，所以出現咗時單時雙嘅情況！哈哈哈～















小公主而家識得反轉身喇，用唔到個U形枕俾佢瞓喇，而家只好俾佢用嚟學爬，好快佢就會識得喺地上面爬爬爬架喇～

 

唔講咁多喇，你哋自己睇片啦～ Bye～

 

 

 

乾炒黑椒汁蝦意粉

(食譜來源: Miss Jubie自創食譜)


http://hk.myblog.yahoo.com/miss-jubie/article?mid=25969

呢個食譜，係我忽然諗到，因為Miss Jubie 實在忽然太想食黑椒汁雞扒意粉，但屋企冇晒雞扒，剩得急凍鳳尾蝦喺雪櫃度，所以就整咗呢個乾炒黑椒汁蝦意粉出嚟，不過呢個乾炒黑椒汁蝦意粉又幾好味，而且 又易整，所以我想post出嚟同你哋分享吓～ 係有少少辣，不過真係好香，好惹味～ 我老公都話唔錯～ 你哋都可以試試架！







材料: (2人份量)

李錦記黑椒汁---3 tablespoon

清水---1 tablespoon

Spaghettini--- 2人份量

蒜蓉---1 tablespoon

急凍已熟去殼鳳尾蝦---20隻

鹽---適量

黑胡椒粗粒---適量




做法:

1. 將急凍急凍已熟去殼鳳尾蝦從冰格拎出解凍，備用

2. 注滿一煲水, 加鹽及少少油攪勻，水滾後放入spaghettini, 熄火蓋蓋焗(約8分鐘)至spaghettini熟透, 撈起, 上碟備用

3. 燒紅個Pan, 加少許油, 炒香蒜蓉粒, 加入已解凍鳳尾蝦, 略兜； 將李錦記黑椒汁加入1 tablespoon清水攪勻，倒入Pan中與鳳尾蝦兜勻，（此時可試味，如覺得太鹹可落少許糖調味）兜勻後，再加入spaghettini炒至水份完全收乾，熄火，上碟

4. 最後，洒上適量黑胡椒粗粒，完成～

小公主出咗牙仔喇～

September 16, 2009 （小公主4個月大）

Miss Jubie呢個星期完全冇時間上網，啲死人廣告都係要等一得閒先可以上嚟Delete!!! 上兩個星期因為小公主吽牙仔，所以成日都發憫憎，唔肯瞓唔肯食，不過好彩，大 家捱咗兩個星期（佢有佢吽牙仔痛，我有我貼身服侍佢煩到頭痛），終於有成果喇。2009年9月12日朝早（仲差4日先夠4個月），小公主吽出兩隻牙仔，就喺 下排門牙位置，出咗啲白色嘅野！姨姨見小公主咁辛苦，於是買咗個電動按摩牙肉機俾小公主咬，等小公主可以舒緩出牙時嘅痛楚......

4日之後，即係YESTERDAY，小公主就足4個月大，於是，我就買咗啲BB FOOD，同米糊俾小公主試食～ 初時，真係驚小公主唔肯食，我又怕我唔識餵，佢又邊食邊喊，差啲濁死佢咁滯，不過好彩，最後餵餵吓，大家有咗默契，小公主食得好落力，又好滿意，咁我就放心晒喇～

住喺隔離屋個阿姨，送咗架車仔俾小公主，於是我哋就立即同小公主玩，你哋睇吓小公主玩得幾HAPPY？

小公主而家學緊講野，日日都學識講唔同嘅短句（講得唔係好正，可能冇牙漏風呱，哈哈！）可惜錄唔切VIDEO，到想影果陣佢又收晒聲唔肯講，不過算啦，我有大把時間慢慢錄！例如有：姨姨.... 好飽呀.... 唔夠呀.... 係呀.... 早晨.... 今日仲學識咗講"爸爸"添！但係仲未識叫"媽媽"！豈有此理，竟然學識叫"爸爸"先？衰女，你好呀，以後叫爸爸泵奶你飲啦！媽媽罷工喇！哼！～～

仲有呀，有一日飲完奶奶玩咗一大輪，突然嘔奶奶，攪到成張梳化都係奶奶，抹到我死死吓，所以老公就罰佢企，點知佢喺度扮懵扮唔關佢事咁樣～ 真係睇到都唔知好嬲定好笑～