香港新浪網 MySinaBlog 精選話題工具
« 上一篇 | 下一篇 »
Miss Jubie | 22nd Jun 2009 | Jubie中華料理 | (10980 Reads)


豬腳薑醋

(食譜來源: Miss Jubie嘅媽咪之食譜)

http://blog.yahoo.com/miss-jubie

Miss Jubie上一篇網誌答應過大家,話如果有Blogger想要薑醋食譜就通知我,我會今篇Post出嚟同大家分享,點知我見到留言簿度原來有咁多 Blogger都想要,咁我就決定Post出嚟啦~ 不過今次呢個薑醋唔係我煮,係我媽咪煮架,所以我未必立即解答到你哋煮薑醋嘅疑問(因為我唔識整呢個),我要等我得閒先問到我媽咪解答,所以會遲啲先覆到 你哋架~ Okay?

材料: (12人份量)

豬手或豬腳---2隻 (買肥大嫩滑有光澤嘅,每隻豬手/腳斬成6件)
生薑---5斤(買大肉薑,大肉薑都係老薑,不過冇老薑咁鬼辣)
雞蛋---12隻(烚熟去殼)(浸鹹蛋係好味,但對剛生完嘅媽媽(鴨蛋)就不宜食)
甜醋(八珍甜醋)---10斤(約4.8Liter左右)
黑糯米醋---1斤(十斤甜醋就加一支黑糯米醋

幼鹽---1 tablespoon

做法:

產前一個月先做呢部份:

1.將生薑去皮後沖洗乾淨,抹乾,將薑放於通風處風乾或者放於太陽下面曬乾(約幾個鐘左右),然後將生薑用刀拍扁,白鑊炒至乾身後才落油及鹽(要落鹽先可以帶出薑嘅味)

 

2.預先將甜醋及生薑放入瓦煲內煮滾,及後最少要浸一個星期,先可以開始正式煲豬腳薑,但如四個星期前已整好呢一Part,就每隔一星期煲滾一次,以免細箘及霉箘滋生

 

臨生前2日:

 

3.豬腳出水時,一定要豬腳同水一齊放落煲,加適量嘅鹽(會另豬腳浸起嚟更好味),用大火煮15mins後,改用細火煮60mins(切記唔可以貪快將豬腳放入已預熱嘅滾水中煮),之後要飛水及沖洗乾淨,以辟走豬操味。

 

4. 將豬腳放入已預備好的薑醋中煮滾,及後加入已烚熟去殼雞蛋翻滾,再浸三日就大公告成!

 

 

Jubie提提你:

 

1.)雞蛋不宜浸太長時間,因為會變得好硬唔好食架 (但係越硬嘅蛋就越補,煲耐咗嘅蛋留俾自己補身食)

 

2.)生左BB之後, 12日後可以派薑醋..... 通常12日後可以食,因為啲惡露通常已經清晒,但惡露未清就最好唔好食,會令惡露增加(薑醋好補架)

 

3.)買生薑(=大肉薑) 煲就最好,大肉薑都係老薑,不過冇老薑咁鬼辣....

 

4.)其實我媽咪呢撐薑醋係有落鹹蛋架,媽咪就捉我要食埋啲蛋~ 不過係食雞蛋,啲鹹蛋我唔食得(最後俾我啲屋企人食晒).....浸鹹蛋係好味,但對剛生完嘅媽媽(鴨蛋)就不宜食,原因就唔清楚,啲老人家係咁講過

 

5.)如食到咁上下,想中途添多啲,其實冇限咩時候, 你隨時可以加豬手,蛋,甜醋同黑糯米醋,加完都係煮滾擺3日,你可以食啲舊嘅,新嘅唔好食住(新舊同一煲,你好易分得到架)至於加甜醋/黑糯米醋加幾多,其實隨意得喇,不過記得份量都係甜醋多,黑糯米醋少~

 

6.)坐月可以食以下食物補身:
薑蛋炒飯,薑醋,火合蛋,薑醋撈飯,煲雞飯(紅棗,杞 子,薑,雞,飯)雞酒(米酒,荷包蛋,雞胸肉,木耳,薑,水)雞酒可照食,但食完果餐唔好餵人奶,將啲奶泵出嚟都唔好要,等下一餐就可以再餵返人奶,明白 未? 雞燉鮮奶 (雞,薑,鮮奶)木瓜煲魚尾(谷奶),淮山杞子燉烏雞,花生雞腳紅棗木瓜魚尾湯(谷奶),木瓜南北杏燉雪耳(滋潤),花膠煲雞湯,北旗黨參煲雞湯,呢啲都 係我媽咪整俾我食嘅補品~

 

7.)除咗洗手同洗面冇辦法之外,最好盡量唔好掂生水同吹生風(即係出街吹風),因為我哋生完,啲毛孔擴大,會好易冷親同埋會第日有風濕,記得唔好用生水洗頭,會有頭風,將來頭痛到你叫救命~

 

8.)沖涼洗頭要用煲滾嘅薑水歎暖嚟沖

 

9.)口渴時飲暖水或飲暖奶(補鈣質)


[1]

妳有冇試過落鹹鴨蛋?好好味嗰喎。

Lindberg
[引用] | 作者 Lindberg | 22nd Jun 2009 | [舉報垃圾留言]


有呀~ 其實我媽咪呢撐薑醋係有落鹹蛋架,媽咪就捉我要食埋啲蛋~ 不過係食雞蛋,啲鹹蛋我唔食得(最後俾我啲屋企人食晒)

[引用版主回覆] | 作者 Miss Jubie | 22nd Jun 2009

[2]

我是多倫多《明報》的記者,看到你的blog上的食譜「豬腳薑」,我們很有興趣刊登在多倫多《明報》的雜誌《樂在明廚》裏,請問你可否提供相片的原裝檔案,以及讓我們刊登在雜誌上?
成功刊登後,我們可以把雜誌寄回給你收藏。
敬覆回候。謝謝。

Regards,

Patsy

Supplement Section

Ming Pao Daily Newspaper


[引用] | 作者 Patsy | 20th Oct 2009 | [舉報垃圾留言]

[3]

想問下.....支黑糯米醋會係幾時落KA..... 3Q3Q


[引用] | 作者 KAREN | 25th Jul 2010 | [舉報垃圾留言]

[4] 無知用白米醋亦或用黑糯米醋

請問煲猪腳薑點解有些用白米醋加甜醋, 有些用黑糯米醋加甜醋煲猪腳, 咁坐月到底要用哪種? 謝謝回覆!


[引用] | 作者 jessica | 1st Dec 2010 | [舉報垃圾留言]

[5] Re: jessica
jessica :
請問煲猪腳薑點解有些用白米醋加甜醋, 有些用黑糯米醋加甜醋煲猪腳, 咁坐月到底要用哪種? 謝謝回覆!

八珍甜醋


[引用] | 作者 Miss Jubie | 6th Dec 2010 | [舉報垃圾留言]

[6] Re: jessica
jessica :
請問煲猪腳薑點解有些用白米醋加甜醋, 有些用黑糯米醋加甜醋煲猪腳, 咁坐月到底要用哪種? 謝謝回覆!

用黑糯米醋加甜醋


[引用] | 作者 Miss Jubie | 6th Dec 2010 | [舉報垃圾留言]

[7]

白鑊炒至乾身後才落油及鹽 --- how much oil and salt, please? What kind of oil? Thank you.


[引用] | 作者 bb | 17th Dec 2011 | [舉報垃圾留言]

[8]

我想問下點解煲左好久豬腳都不是很淋


[引用] | 作者 Mayzo | 15th Jul 2013 | [舉報垃圾留言]