小公主學爬起
September 10, 2009 （小公主3個月3星期大）

Miss Jubie呢幾日都冇時間上網，因為小公主想吽牙仔，成日都發憫憎，唔肯瞓，就算瞓到，唔夠一陣就醒，又成日扭計喊，啲喊聲好似行雷咁響！食奶嘅分量好唔 穩定，一時食少少就唔肯再食，一時又好似餓鬼上身咁，食極都唔飽，真係好難服侍喎～～ 不過好彩，到咗夜晚，佢可能憫咗成日嘅關係，所以必定臨瞓食餐最飽嘅，然後一覺瞓天光！(我領願Keep住係咁，日頭佢癲完，夜晚我哋有覺好瞓丫嘛～) hee...hee...hee...

呢 幾日小公主又有新進展，今次學識咗三樣野。第一，學識伸出手仔拎起啲野，例如巾仔，公仔咁.....手仔識得一開一合去執起啲野玩！第二，學識平瞓喺度 時，自己反身喇，雖然唔係次次都得，但出現咗佢嘅第一次喇！第三，就係學識爬起身，上個星期，我試過將佢心口扒地，睇吓小公主識唔識用腰力，手髀力同頸力 幫自己爬起身，但當時仲未做得到，但今日再試，小公主已經做到喇～～睇吓佢幾叻～～哈哈哈～ (=^o^=)

前幾日終於有得拎上次去STUDIO影嘅相同相架喇～ 所以立即掛起個相架，呢輯相影得好好，我同"打令"老公都好鐘意，我就post其中一張俾你哋欣賞吓啦～ (o^_^o)>

爬到咁上下，"打令"老公走埋嚟同小公主玩，冇喇喇用個頸枕戴落小公主個頭上面，仲問我睇吓小公主個頭箍靚唔靚，簡直笑到我呢..........想死咁滯!!! 唔講咁多喇，你哋自己睇片啦～ BYE BYE！～ (o^_^o)