大個女

October 29, 2009 （小公主5個月13日大）

小公主已經5個月13日大喇，呢隻衰豬自從學識用手拎野之後，而家成日手多多，咩都用手去摸，去拎。見到啲新奇嘅野，會先望一輪，然後會用手去摸摸，啱心水就會立即放入口咬！所以我一定要將所有野抹一次／消毒一次先可以俾小公主玩。







而家好叻呀，只要輕輕扶著佢，小公主就可以企得好直，腳骨力真係幾好～ 不過自己坐著時，仲未可以伸直腰坐，爬地下時，仲未識郁向前，只係可以360度旋轉～ 最好笑係，每當抱起佢，對腳會靠差咁撐，好似跳芭蕾舞咁，好鬼Cute！







而家小公主會周圍望，識得認人，同埋見到郁嘅物件，對眼同頭仔會跟住件物件郁，好好笑～









我而家泵唔夠人奶喇，我諗過多一排就會回奶。所以開始要用奶水代替人奶，而家小公主會慢慢改食奶水同米糊，而家每日食五餐，只有一餐食人奶。











小公主而家一喊，就會自動識得叫媽咪同爸爸（只限喊果陣），平日叫佢叫，死都唔肯講！