November 30, 2009 （小公主6個月14日大）

小公主話咁快就6個半月大喇，Miss Jubie真係有啲唔捨得小公主初出世BB嘅時期，因為當時身體實在太細小，啲手手腳腳樣樣都好袖珍，好可愛，而且小公主當時只會食，屙，同埋瞓，連喊都唔算多，對於我嚟講，真係算好好湊～

小公主每日長大，漸漸學識好多新事物，喺呢短短6個半月嘅時間，小公主由一個只識腳撐撐，同埋只會喊嘅BB，已經變成一個人見人愛嘅小B女，一個會識一次過塞晒10隻手指落口咬嘅小公主，一個成日流口水流到成床都係嘅小公主，一個成日BU口水，BU到人哋成面都係口水嘅小公主，一個只會向後爬嘅小公主。

小公主唔單至係咁，佢已學識坐喺度，用手仔玩自己啲腳趾仔，有時仲想捧隻腳用口咬！（撞鬼囉～）識得扒喺地，雙手雙腳伸開，好似跳傘咁！（可能練緊平衡力～）我得閒就同佢玩照鏡，記得最近有一次，佢似乎終於知道鏡中係自己，而且識得用手仔去摸塊鏡，然後對住自己嘅倒影係咁笑，然後就係咁用手係咁摸鏡中自己！（可能覺得新奇～）

最好笑係，最近小公主學識用手將自己最心愛嘅奶咀送俾人食，哈哈哈～ （真係好SWEET架！）自己食食吓，同佢講：我又想食喎，跟住佢就眼定定望住人幾秒，然後好含羞答答咁從自己口中拎出個奶咀遞到你咀邊！！！哈哈哈～

而家同小公主玩，最好玩就係佢會玩到識得KA KA 聲咁笑，嗰對腰果眼，真係殺死人！～ 哈哈哈～

呢 次係Miss Jubie第4次帶小公主去打針針～ 食埋最後呢次防止輪狀病毒腸胃炎嘅滴滴藥，就唔使再食喇！另外要打多兩支針。今次老公陪唔到我同小公主睇醫生，換咗我媽咪陪我去..... 小公主話咁快就6個月大，諗起當初第一次同佢嚟睇醫生，真係好似冇幾耐嘅事，哈哈哈～

呢排小公主好鬼黐身，乜都要我陪佢，行開一陣，就會大嗌叫我返嚟，我想做吓自己野都唔得。有時諗住抱佢瞓，吼佢瞓着，就靜靜地抱佢去返床仔度瞓，點知一放低佢就即醒，跟住就撐大對眼仔，仲不知幾咁精靈咁望實我，跟住我就梗係行唔開啦，就咁又冇晒啲私人空間喇，日日都係咁。











仲有佢呢排特別鍾意企起身同埋鍾意乜都擺落口用條脷去LAM，真係怕佢遲早LAM到生積。（我已經成日睇實佢，同抹過啲野先俾佢LAM....)









所 以話呢，有得去街嗰日（星期六）就係我幾放監日真係冇錯架，今次去SHOPPING去睇吓BABY啲鞋仔，原本見到對鞋仔幾得意，諗住買俾小公主，點知婆 婆同姨姨同佢試著嗰陣，小公主係咁撐，好肯定咁話我哋知佢唔鍾意嗰對鞋，哈哈哈～ 真係人仔細細，就咁有主見，第時大個就一定係麻煩友！











小 公主最近學識爬爬，不過係向後爬，仲識得360度爬，但係就未學識向前爬！！我而家冇再餵人奶喇，改餵奶水同食糊仔。醫生話小公主而家每日最少要食2餐糊 仔，其餘3餐就飲奶奶。咁都好，之前冇再餵人奶，要買奶水同奶粉，先發覺原來啲奶水同奶粉咁鬼死貴，不過好彩我都慳咗起碼5個幾月嘅奶粉錢！！都算唔錯喇 ～ 哈哈哈～

(閱讀全文)

http://hk.myblog.yahoo.com/miss-jubie/article?mid=28218

呢個韓國炒粉絲其實Miss Jubie都整過幾次，但一直都冇影同POST過食譜，因為太多準備功夫，每一次都的唔起心乾去整理啲相，近日見冇咩食譜出，就整呢個啦～
每次整襯呢個菜式，都會整到成屋好香麻油味架～





材料: (4人份量)

洋蔥---半個 （洗淨，抹乾，切絲）

甘筍（細細粒生食都得果種）---10粒 （洗淨，抹乾，切絲）

紅椒---1個（洗淨，抹乾，去囊，切絲）

黃金椒---1個（洗淨，抹乾，去囊，切絲）

雪花肥牛肉---1 包

花菇---6粒（洗淨，用熱水浸至發大，切絲）

韓國粉絲---半包 （約250G）

蒜頭---4瓣 （拍扁，去衣，切成蒜粒）

青蔥---2條 （洗淨，抹乾，切段）

芝麻---適量

韓國粉絲

調味料：

醬油---適量

胡椒粉---適量

味琳---適量

麻油---少許 （最後先落）



做法：

1. 先將洋蔥，甘筍，紅椒，黃金椒洗淨，抹乾，切絲； 花菇洗淨，用熱水浸至發大，切絲；青蔥洗淨，抹乾，切段；蒜頭拍扁，去衣，切成蒜粒，備用

2. 煲滾水，放入韓國粉絲後轉細火加蓋煮6至8分鐘，熄火，撈起用冷水過冷河，直至韓國粉絲完全冷卻，瀝乾，備用

3. 燒紅個PAN，落油，轉中火，先爆香蒜粒及洋蔥，依次序加入甘筍絲，紅椒絲，黃金椒絲及花菇絲，略兜，再加入雪花肥牛肉，略兜，然後將所有調味料混合，一 齊倒入PAN中煮至肥牛肉變九成熟，加入青蔥段段，再加入已瀝乾嘅韓式粉絲，然後將所有材料完全地撈勻，最後加上少許麻油及芝麻，完成～

http://hk.myblog.yahoo.com/miss-jubie/article?mid=28009

Miss Jubie又病咗喇，呢排天氣真係好易令人病，繼早前感冒，今次作傷風，好彩傷風及時制止，但咳就咳成咗！日頭就仲好啲，冇咳得咁厲害，但到夜晚就真係咳到甩肺，食咳藥水都冇用，好辛苦～



講返呢個蒜鹽煎三文魚扒先，呢個菜式其實我成日都整，不過竟然未POST過食譜出嚟，今日就POST出嚟同大家SHARE，其實咁樣整，真係好好味，簡簡單單又一味喇～





材料: (2人份量)

三文魚扒---1 塊（洗淨，抹乾）

蒜鹽粉---適量

黑胡椒粗粒---適量

卡夫奇妙醬---適量

檸檬---1/8瓣



做法:

1. 將三文魚扒洗淨，抹乾，用適量蒜鹽粉及黑胡椒粗粒醃好，備用

2. 燒紅個Pan, 轉中火，落油, 放入三文魚扒，煎至兩面變金黃色，然後上碟, 備用

4. 最後可以灑上檸檬汁及沾上卡夫奇妙醬伴食，完成～

香茅煎雞翼

http://hk.myblog.yahoo.com/miss-jubie/article?mid=27456

Miss Jubie嘅感冒終於完全好番，但竟傳染咗俾"打令"老公，今次真係大件事！呢兩日唯有煲粥俾"打令"老公食啦～

今 次食譜講香茅煎雞翼，呢個係前幾日整嘅小食，因為我前幾日感冒，所以晾到今日先有心機執相Post出嚟。呢個香茅煎雞翼當小食又得，當晚飯菜式都可以，夠 方便～ 不過，我只係嫌啲李錦記香茅醬唔夠入味，所以每次我都會用鹽及胡椒碎粒醃一醃啲肉類先，另外，啲香茅味唔夠香濃，所以，我自己都會額外加多啲香茅碎落去。










材料: (2人分)

雞中翼---20隻

急凍香茅碎---1 tablespoon

李錦記香茅醬---50g

鹽---適量

胡椒碎粒---適量



做法：

1. 先將雞中翼洗淨抹乾, 加入鹽及胡椒碎粒攪勻，略醃

2. 再加入李錦記香茅醬攪勻，將其放入保鮮袋封好，放入雪櫃醃一晚，備用

3. 將GRILL PAN用猛火燒紅，加油後轉用中小火，慢慢逐隻雞翼放入，不時要將雞翼兩面反下, 煎至兩面都變金黃色，及確保兩面都熟透（呢個步驟要俾啲耐性，唔好心急，唔好貪快用猛火煎，用太猛火會令雞翼變焦但內裡雞肉仍然生嘅情況出現）

4. 當香茅雞翼完全熟透後，熄火，將香茅雞翼逐一排好於碟上，完成～